الأربعاء، 14 أغسطس 2013

إحســـاس جميل :)

إحساس جميل إنك تفرج كربة حد.. تشيل هم من على قلبه .. بيجيلك إحساس كدا إنك إبن الحلال اللي وقف في طريق الشخص ده.. الأجمل إن كل دا لوجه الله على أمل إن ربنا يفرج كربتك يوم الدين..
إمبارح كانت الدنيا زحمة بشكل مش طبيعي..
الناس مش طايقة بعضها وكلو بيلعن في كلو !
ركبت أول تاكسي .. مابطلش شتيمه في خلق الله وشتيمه في العربيه والبلد .. بصراحة انا كمان كنت بشتم في سري .. الوضع بقى صعب .. فعلا .. الناس مابق
تش عارفة تتنفس !
بس بصراحة انا بحب الزحمه دي لسبب واحد بيبسطني قوي .. بعدي الطريق براحتي ..
المهم وصلت طلخا .. الدنيا منيلة بستين نيلة !!
قلت لنفسي مستحيل الاقي تاكسي شكلي هاروح مشي ..
طبعا كل التكسيات جاية مليانه.. وفجأة .. يوقفلي ربنا إبن الحلال!
كفاية صوت استغفارو طول الطريق .. ريحلي أعصابي وحسيت إن الدنيا أمان .. مش بس كدا أنا بدأت أستغفر ربنا أنا كمان
وقف السواق واستنى لما الست الكبيرة تنزل وبكل ذوق قالها : على مهلك ياحاجه خاالص..مع انها كانت دافعه اقل م الاجرة
ونزلت .. في شارع جانبي لقينا تاكسي جاي بالعكس والسواق عيل عندو 17 سنه تقريبا .. المهم رجع السواق لاخر الشارع وعداه الأول .. عجبني جدا لما السواق التاني قرب وقاله : والله انت سواق ذوق ومحترم

وصلني وماخدش مني فلوس زياده .. وعاملني بكل احترام
هي دي الراحه والطمأنينه اللي حسيتها إمبارح .. حسيت بسعادة الراجل دا وهو بيخفف عن الناس همومهم وقد إيه كان راضي وسايبها على الله !!
كان نفسي قوي اشكرو واقولو ع الاقل جزاك الله كل خير .. بس اتكسفت واكتفيت بالسلام .. :)

ليست هناك تعليقات:

إرسال تعليق